‘झिल्को’को टिकट बुकिङ खुल्ला

विशेष अनलाइन । चलचित्र ‘झिल्को’को अग्रिम टिकट बुकिङ खुल्ला भएको छ। निर्माण युनिटले शुक्रबारदेखि देशभर प्रदर्शनमा आउने चलचित्रका लागि टिकट बुकिङ खुला गरेको जनाएको छ। यद्यपि, हालसम्म चलचित्रले कति शो पाएको छ भन्ने विवरण सार्वजनिक गरिएको छैन।

‘झिल्को’ डिजिटल युगमा प्रविधिको अनियन्त्रित प्रयोगले बालबालिका, अभिभावक र समाजमा पार्ने गम्भीर असरको कथामा आधारित छ। चलचित्रले बालबालिकाको जीवनशैली, पारिवारिक सम्बन्ध, र सामाजिक स्वास्थ्यमा देखिएको परिवर्तनप्रति प्रश्न उठाएको छ।

सुनिल पोखरेल, वर्षा सिवाकोटी, विशाल पोखरेल, भोलाराज सापकोटा, जान्वी बस्नेत, जेनीश श्रेष्ठ र जेभीश श्रेष्ठलगायतका कलाकारहरूको अभिनय रहेको चलचित्रको निर्देशन यादवकुमार भट्टराईले गरेका हुन्। ‘झोला’ जस्तो चर्चित चलचित्र निर्देशन गरिसकेका भट्टराईले यो चलचित्रमार्फत अभिभावक, शिक्षक, र नीति निर्माताबीच आवश्यक समन्वयको सन्देश दिन खोजिएको बताएका छन्।

मिडिया फर कल्चर प्रा.लिको ब्यानरमा निर्माण गरिएको चलचित्रको छायाङ्कन दीपक बज्राचार्यले गरेका हुन् भने सम्पादन निमेष श्रेष्ठको रहेको छ। चलचित्रको कथा तथा पटकथा यादवकुमार भट्टराई, अरुणदेव जोशी र देव व्रतले संयुक्त रूपमा तयार पारेका हुन्।

चलचित्रका कार्यकारी निर्माता उमेश पौडेल हुन्। निर्माता सुशीला आचार्य, रामगोपाल थापा र किरण कुमार आचार्य रहेका छन्। फिल्म जनता टिभीको सहकार्यमा निर्माण गरिएको हो।