विशेष अनलाइन । नेपाली चलचित्र ‘महाभोज’को पहिलो गीत ‘मख्खै परेँ’ सार्वजनिक भएको छ। आगामी जेठ १५ गते बिहीबार प्रदर्शन हुने यस चलचित्रको गीतमा कौडा भाकाको आकर्षण पाइन्छ। गीतमा सुरेन्द्र दियालीको शब्द, प्रशान्त सिवाकोटीको सङ्गीत तथा स्वर छ भने ससिका राईले सहगायन गरेकी छन्।
गीतको भिडियोमा प्रमुख कलाकारहरू दयाहाङ राई, खगेन्द्र लामिछाने, अञ्जना बराइली, गौमाया गुरुङ र मलिका महतले कौडा नृत्य प्रस्तुत गरेका छन्। अभिनेता आर्यन सिग्देल र अभिनेत्री सुरक्षा पन्तको विशेष उपस्थितिले भिडियोलाई थप आकर्षक बनाएको छ। भिडियोमा आर्यनलाई गाउँका प्रतिष्ठित व्यक्तिका रूपमा देखाइएको छ भने सुरक्षा उनकी पत्नीको भूमिकामा छिन्। अन्त्यतिर मलिका र खगेन्द्र छापामारको पहिरनमा देखिन्छन्, जसले चलचित्रको कथावस्तुलाई अझ रहस्यमय बनाएको छ। भिडियोको कोरियोग्राफी मौसम हिमालीले गरेका हुन्।
दिनेश राउतको निर्देशनमा बनेको ‘महाभोज’लाई दर्शकले उच्च अपेक्षाका साथ प्रतीक्षा गरिरहेका छन्। विकास सुवेदीले लेखेको कथा तथा पटकथामा बनेको यस चलचित्रमा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाह लगायतका कलाकारहरूको अभिनय रहेको छ। क्लक वर्क क्रियशन र पिक्चर फ्रेमको संयुक्त निर्माणमा बनेको चलचित्रका निर्माता हिमाल कडरिया हुन्।
Discussion about this post